02 Sep 2015

Հարգելի համաքաղաքացիներ

Խորհրդարանական ընտրությունները, որոնք կայացան մայիսի 6-ին, անցան պատմության գիրկը:
Առիթ ունեցել եմ ասելու, որ այդ ընտրություններում ես չեմ պարտվել, “հաղթել են” ընդամենը պետության վարչական, ուժային, դատախազական, ֆինանսական ռեսուրսները, կատարելության հասցված կեղծիքների եւ անվավերների մեխանիզմը:

Ես ընտրվել եմ, բայց ինձ չեն գրանցել:

Այնուամենայնիվ, ես հիասթափված չեմ: Ավելին, հետընտրական այս շրջանում բազմաթիվ հեռախոսազանգերն ու ինձ հասցեագրված նամակները վստահություն են ներշնչում, որ Հայաստանում արագ ձեվավորվող ազատ եւ արժանապատիվ քաղաքացիների բազմության շնորհիվ մենք ունենալու ենք մեր երազած անվտանգ եւ արդար երկիրը:

Կրկին խոստանում եմ. անկախ ընտրությունների արդյունքներից, հնարավորություններիս չափով, կիսելու եմ ընտրատարածքի բնակիչների հոգսերը եւ միշտ հասանելի եմ լինելու նրանց համար: Ձեզ հուզող հարցերով ինձ կարող եք դիմել saribek.sukiasyan@gmail.com էլեկտրոնային փոստի միջոցով, կամ այցելել մշտապես գործող Սուքիասյանների հանրության հետ կապերի գրասենյակ:

Անկեղծորեն
Սարիբեկ Սուքիասյան

29May
Comments Off

Մենք կառավարում ենք ոչ միայն մեր, այլ նաեվ քաղաքացիների ֆինանսական միջոցները

11582b5e3ff02901c5f4d9389a6865f6Հարցազրույց «Հայէկոնոմբանկի» խորհրդի նախագահ Սարիբեկ Սուքիասյանի հետ

- Պարո´ն Սուքիասյան, ինչպե՞ս եք գնահատում ՀՀ ԿԲ-ի 2014թ. դեկտեմբերի 30-ի որոշումը, համաձայն որի՝ 2017թ. հունվարի 1-ից բանկերի համար սահմանված նորմատիվային կապիտալը պետք է կազմի նվազագույնը 30 մլրդ ՀՀ դրամ՝ ներկա 5 մլրդ-ի փոխարեն:

- Կարծում եմ՝ ՀՀ ԿԲ այս որոշման կատարումը դժվար է լինելու շատ բանկերի համար, քանզի շուկայում գործող 21 բանկերից տարեվերջի դրությամբ միայն 5 բանկեր էին համապատասխանում սահմանված նոր չափանիշին: Մնացած բանկերն ստիպված են լուծումներ փնտրել ստեղծված իրավիճակում: Այնուամենայնիվ, ՀՀ ԿԲ խորհրդում աշխատում են խորքային գիտելիքներով մասնագետներ եւ, ուրեմն, այդ որոշումն ընդունելիս հաշվի են առել բոլոր դրական եւ բացասական կողմերն ու հետեւանքները: Հնարավոր է, որ ՀՀ ԿԲ այս որոշման պատճառներից մեկը եղել է դրամի արժեզրկումը, ինչի հետեւանքով որոշ բանկերում դասակարգվող արտարժութային վարկերի առկայությունը կարող էր վտանգել նրանց կայունությունը եւ, հետեւաբար, նաեւ ՀՀ ամբողջ բանկային համակարգը: Կարծում եմ, որ որոշում ընդունելիս ՀՀ ԿԲ-ն, առաջին հերթին, պետք է առավել ուշադրություն դարձներ նմանատիպ բանկերի կապիտալի մակարդակին: Պետք է նշեմ, որ ՀՀ բանկային համակարգն ԱՊՀ երկրների բանկային համակարգերի շրջանում զբաղեցնում է առաջատար դիրքեր:

- Ինչքանո՞վ են կառավարելի «Հայէկոնոմբանկ»-ում այդպիսի ռիսկերը:

- Ամբողջ աշխարհում բիզնեսի տրամաբանության մեջ մի կարեւոր հանգամանք կա՝ հնարավորինս փոքր կապիտալով ստեղծել համակարգ, որը մեծ շահույթ կբերի: Մեր Բանկի պարագայում դա այսօր արված է: Խոսեմ թվերով: «Հայէկոնոմբանկ»-ը, ունենալով 2.3 մլրդ դրամ կանոնադրական կապիտալ, մոտ 100 մլրդ դրամ ակտիվներ, 50 մլրդ դրամ վարկային պորտֆել, ունի վարկերի վերադարձելիության գրեթե 99,5%:

- Ավելի մանրամասն կարո՞ղ եք ներկայացնել, թե ինչ քայլեր է ձեռնարկելու «Հայէկոնոմբանկ»-ը՝ իր կապիտալը ՀՀ ԿԲ որոշմանը համապատասխանեցնելու նպատակով:

- Քանի որ Կենտրոնական բանկի որոշումն արդեն ընդունված է, մենք կհամապատասխանեցնենք կապիտալը այդ որոշմամբ սահմանված պահանջներին՝ արդեն այս տարվա վերջին այն հասցնելով 20 մլրդ ՀՀ դրամի շեմին: Արդեն այս տարվա սկզբից Բանկի հիմնական բաժնետերերը մոտ 5 մլրդ դրամով համալրեցին բանկի նորմատիվային կապիտալը: Առաջիկա ամսվա ընթացքում նախատեսվում է 5 մլրդ դրամի բաժնետոմսերի թողարկում, որոնք կիրացվեն բաց բաժանորդագրության միջոցով, այսինքն՝ կարող են ձեռք բերվել ցանկացած անձի կողմից: Հիմնական բաժնետերերս՝ Սուքիասյան եղբայրներս, նախատեսում ենք ձեռք բերել մոտ 4 մլրդ ՀՀ դրամի բաժնետոմսեր: Արդեն հրապարակվել է բաժնետոմսերի թողարկման ազդագիրը` պոտենցիալ ներդրողներին հասանելի դարձնելով թողարկվող բաժնետոմսերի վերաբերյալ տեղեկատվությունը:

- Իսկ ինչպե՞ս եք պատկերացնում ՀՀ բանկային շուկան 2017թ․-ից հետո, ինչպիսի՞ն են Ձեր կանխատեսումները:

- ԿԲ որոշման արդյունքը պետք է լինի հայաստանյան բանկերի խոշորացումը: Բայց, անկեղծ ասած, հայկական իրականության պայմաններում դժվարանում եմ հավատալ բանկերի միավորումներին, քանզի հայ սեփականատերը միշտ ձգտում է տիրապետել բաժնետոմսերի վերահսկիչ փաթեթին. այլ տարբերակ նույնիսկ չի էլ դիտարկվում: Մեր ընտանիքը չունի նման կարծրատիպեր, մենք դիտարկում ենք համագործակցության ցանկացած արդյունավետ տարբերակ: Այն բանկերը, որոնք կհաղթահարեն 2017թ․ պատնեշը, կկանգնեն մեկ այլ խնդրի առջեւ, քանի որ, մեր կանխատեսումներով, շուկայում մրցակցությունը շատ ավելի է սրվելու: Դա, իհարկե, պայմանավորված կլինի այն հանգամանքով, որ բանկերն ավելի շատ ազատ ռեսուրսներ կունենան: Ստեղծված իրավիճակում հնարավոր է որոշ բանկեր պարզապես դուրս մղվեն մրցակցությունից: Այս պարագայում, իհարկե, առավելություն կստանան այն բանկերը, որոնք ավելի էժան ռեսուրսներ ունեն եւ առավել ճիշտ են կառավարում իրենց ակտիվները: Պետք է հաշվի առնել այն հանգամանքը, որ մենք` կառավարիչներս, կառավարում ենք ոչ միայն մեր, այլ նաեւ քաղաքացիների ֆինանսական միջոցները եւ պատասխանատվություն ենք կրում այդ ամենի համար: Նշեմ նաեւ, որ շատ փորձագետներ հրապարակային իրենց դժգոհությունն ու անհամաձայնությունն են արտահայտում ՀՀ ԿԲ այս որոշման վերաբերյալ, եւ ես չեմ բացառում, որ որոշման իրագործման ժամկետները կարող են հետաձգվել մինչեւ 2020թ.-ն:

- Պարո´ն Սուքիասյան, ինչպիսի՞ն է իրավիճակը շուկայում այսօր, որքանո՞վ են բանկերը նպաստում ՀՀ տնտեսության աճին:

- Բանկերը հանդիսանում են տնտեսության լոկոմոտիվը, ուրեմն եւ Կենտրոնական բանկը, եւ Հայաստանի բանկերի միությունը պետք է մշտապես աջակցեն առեւտրային բանկերին: Այսօր հայկական բանկերն ակտիվորեն բանակցում են միջազգային դոնորների հետ՝ հնարավորինս ցածր տոկոսադրույքով ռեսուրսներ ձեռք բերելու նպատակով: Այդ օգնությունը բանկերը պետք է կարողանան նաեւ ՀՀ ԿԲ-ից ստանալ: Չէ՞ որ, որքան իջնի ներգրավվող ռեսուրսների «գինը», այնքան կիջնի վարկերի տոկոսադրույքը, ինչն էլ խթան կհանդիսանա տնտեսական ակտիվության բարձրացման համար: Նորմատիվների միջոցով կարգավորումները` խոսքս վերաբերում է ՀՀ ԿԲ կողմից պարտադիր պահուստավորման նորմատիվի խստացմանը, հիմնականում ժամանակավոր բնույթ պետք է կրեն: Հուսով եմ, որ մոտ ժամանակներս ՀՀ ԿԲ-ն կմեղմացնի նաեւ պարտադիր պահուստավորման նորմատիվի նկատմամբ պահանջները, ինչը կնպաստի բանկային գործունեության, հետեւաբար՝ նաեւ տնտեսության ակտիվացմանը:

- Պարո´ն Սուքիասյան, հունիսի 19-ին կայանալու է «Հայէկոնոմբանկ» ԲԲԸ բաժնետերերի տարեկան ժողովը: Նախատեսո՞ւմ եք արդյոք շահաբաժիններ վճարել այս տարի:

- «Հայէկոնոմբանկ» ԲԲԸ խորհուրդը որոշում է ընդունել 2014թ. գործունեության արդյունքներով բաժնետերերին շահաբաժիններ վճարելու վերաբերյալ եւ հարցը ներկայացրել է բաժնետերերի տարեկան ժողովի քննարկմանը, ինչը եւս մեկ անգամ ապացուցում է, որ «Հայէկոնոմբանկ»-ի բաժնետոմսը ոչ միայն բանկի ղեկավարմանը մասնակցելու իրավունք է, այլ նաեւ բաժնետիրոջ եկամտաբեր ներդրում:

27May
Comments Off

Մայիսի 23-ը հորս`Ալբերտ Սուքիասյանի ծննդյան օրն է : Նա կդառնար 80 տարեկան :

Ընտանիքի անդամներով նշեցինք նրա 80-ամյա հոբելյանը: Մեզ միացան բազմաթիվ ընկերներ, բարեկամներ ու գործընկերներ :

Այդ օրը մենք մի շարք աշխատակիցների պարգևատրեցինք «Ալբերտ Սուքիասյան»  հուշամեդալով  իրենց երկարամյա ու անբասիր աշխատանքի համար: Այդ ավանդույթը կշարունակենք այսուհետ:

Բոլորը հիշեցին հորս, նրա էության մեջ համակցված բարությունն ու խստապահանջությունը, արդարամտությունն ու առատաձեռնությունը:

Ամբողջ կյանքը նա աշխատեց արժանապատվորեն, մնաց  շիտակ ու ազնիվ,  տքնաջան աշխատանքով  միասին ստեղծեցինք մեր ունեցվածքը:

Նրա կյանքի իմաստն ու էությունը ազնիվ ու քրտնաջան աշխատանքի մեջ էր : Հիշում եմ, թե ինչպես էր վաղ առավոտյան, լույսը բացվելուն պես աշխատանքի գնում: Այդպես էլ մեզ էր մեծացնում-դաստիարակում: Մեզ որակյալ կրթության տվեց, սակայն նաև աշխատել սովորեցրեց, որպեսզի հասկանանք արդար քրտինքով ստեղծածի արժեքը:

Այսօր էլ բոլորն են հիշում թե ինչ  հզոր կամքի ուժի և անսպառ եռանդի տեր անձնավորություն էր:

Հիմա էլ մենք` նրա որդիները, շարունակում ենք մեր հոր  ավանդույթները, միմյանց զորավիգ լինում ու մեր աջակցությունը բերում երկրի ու ժողովրդի բարեկեցությանը: Հիշում ենք հորս պատգամը և իրականացնելու ենք այն:

Երբեք չենք մոռանում  նրա խոսքերը. «Հայրենիքը պետք է սիրել, պետք է պաշտել և տեր կանգնել»:

Ես հպարտանում եմ, որ Ալբերտ Սուքիասյանի տղան եմ և խոնարհվում եմ նրա հիշատակի առջև :

Սարիբեկ Սուքիասյան

 

Ծնունդդ շնորհավոր իմ սիրելի պապի:  Քո մասին բոլոր հիշողությունների շնորհիվ ես  ինձ երջանիկ եմ զգում, քանի որ դու այն մարդն  էիր, որ ինձ միշտ  երջանկացնում էր:

Դու մի կատարյալ ընտանիք ես ստեղծել,  որի մասին ոչ ոք չի կարող երբեւէ երազել: Այսօր ես հպարտ եւ ուրախ եմ,  որ մի մասն եմ  քո ծագումնաբանության:

Ես  նաեւ հպարտ եմ, որ իմ Աբո պապին շատ լավ բան է արել  իմ երկրի համար:  Նա հայ մարդու կոնկրետ օրինակ է եղել:  Սակայն, իր կյանքում ամենակարեւորը եղել է նրա ընտանիքը: Նա միշտ սովորեցնում էր մեզ սիրել, հարգել եւ պաշտպանել իր ստեղծած  ընտանիքը:

Ես սիրում եմ քեզ պապի, դու  ինձ համար միշտ կատարյալ մարդու  լավագույն օրինակն ես: Ես շատ եմ ուզում քեզ նմանվել: Քեզ շատ եմ կարոտում: Ութսունամյակդ շնորհավոր:

Խաչատուր Էդուարդի Սուքիասյան

 

Իմ ամենասիրելի Պապի,

Ես չգիտեմ, թե ինչպես կարելի է բացատրել, թե ով էիր դու ինձ համար: Դու նման ես մի հրեշտակի, որ պաշտպանում է ինձ ամենուր:  Ես այնքան երախտապարտ եմ Աստծուն, որ քո թոռնիկն եմ. Ես երբեք չեմ կարող պատկերացնել, որ կարելի է ավելի լավ պապիկ ունենալ, քան դու ես: Դու էիր լավագույնը եւ  միշտ լինելու ես լավագույնը:

Հիշում եմ, որ դու ինձ խոստացել էիր ներկա լինել իմ հարսանիքին: Երանի թե  կարողանայիր իրականացնել դա:

Իմ ամենաերջանիկ պահերը կյանքում եղել այն պահերը, երբ ես քեզ հետ էի, նույնիսկ պարզ նախաճաշը էր առանձնահատուկ էր, երբ այն  քեզ հետ էր:  Այո, հացով մեղրն  ավելի համեղ է կարագի հետ:

Պապիկ, այն սերն ու համբերությունը, որ դու ցուցաբերեցիր իմ հանդեպ, այսօր օգնեցին ինձ  ձևավորվելու որպես անձ:   Պարզապես ուզում եմ շնորհակալություն հայտնել քեզ այն ամենի համար, այն  բոլոր զոհողությունների համար, որ դու արել ես:

80-ամյակդ շնորհավոր, Պապիկ:

Աննա Սարիբեկի Սուքիասյան

23April
Comments Off

genocide

07March
Comments Off

104178993_large_01Սիրելի մեր մայրեր, քույրեր, կանայք եվ աղջիկներ

Յուրաքանչյուրդ թանկ եք մեզ համար, սիրված և ցանկալի

Թող ժպիտը չպակասի Ձեր դեմքից, որպես երջանկության և սիրո խորհրդանիշ

Շնորհավոր Ձեր մարտի 8-ը

 

Հարգանքներով` Սարիբեկ Սուքիասյան

30December
Comments Off

Շահում է այն ժողովուրդը, որի իշխանավորը կամ կառավարիչը տնտեսագիտորեն է մտածում

article_pic1- Համաշխարհային տնտեսության պատմության XX դարի վերջին տասնամյակների կարևորագույն իրադարձություններից մեկը դարձավ Չինաստանի տնտեսության աննախադեպ հաջողությունը:
Չինաստանի Ժողովրդական Հանրապետությունն այսօր ամենաարագ զարգազող տնտեսություն ունեցող երկրներից է, հիմնական տնտեսական ցուցանիշներով մոտենում, որոշ ցուցանիշների գծով նույնիսկ գերազանցում է զարգացած երկրներին: article_pic2Ներկայումս այս երկրի արտադրանքի մասին արդեն սխալ կլինի ասել, թե այն ցածրորակ է: Գիտատեխնիկական և արտադրական բազայի զարգացման հետ Չինաստանի արտադրության որակն էականորեն աճել է: Չինական ընկերությունների արտադրանքը հաճախ արդեն ոչ միայն չի զիջում, այլ նույնիսկ կարող է մրցակցել Չինաստանից արտահանվող հայտնի բրենդների արտադրանքի հետ:
article_pic3Չինաստանի տարբեր քաղաքներ մասնագիտացել են առաձին արտադրատեսակների գծով՝ իրենց արտադրանքի որակը հասցնելով գրեթե կատարելության: Եթե նախկինում աշխարհահռչակ բրենդները տեղակայվում էին միայն խոշոր քաղաքներում, ապա այժմ նրանք արդեն գրավում են նաև փոքր քաղաքները:
Հատկանշական է, որ 1970-ականների վերջերին Չինաստանի տնտեսությունը փոխեց իր ուղղվածությունը՝ փակ, կենտրոնացված պլանային տնտեսությունից անցում կատարելով ավելի շուկայականին մոտ տնտեսության:
Չինաստանի զարգացմանը մեծապես նպաստել են երկրում առկա տնտեսական գոտիները, որոնք գործում են արտոնյալ ռեժիմով: Այդպիսիք են հատուկ տնտեսական գոտիները, որտեղ բացի հարկային արտոնություններից կիրառվում են նաև այլ, ոչ հարկային արտոնություններ, այդ թվում’ հողի, ջրի, հոսանքի, գազի օգտագործման դիմաց կատարվող վճարներից ազատում, վարձակալական վճարներից ազատում կամ այդ վճարների կրճատում, ազատ մաքսային գոտիները, որտեղ արտասահմանյան արտադրության ապրանքների համար մաքսային վճարումներ չեն իրականացվում, չեն կիրառվում ներմուծման լիցենզիաներ, ընդ որում’ ավելացված արժեքի հարկ և մաքսային վճարներ չեն գանձվում, եթե տվյալ ապրանքն արտահանվելու է Չինաստանից:article_pic4 Տնտեսության վերելքին նպաստեցին նաև նոր և բարձր տեխնոլոգիաների գոտիները, պետական մակարդակի սահմանամերձ տնտեսական համագործակցության գոտիները:
Օտարերկրյա մասնակցութուն ունեցող ընկերությունները ստացան մի շարք հարկային արտոնություններ՝ նվազագույնը 2 տարով ազատվում էին շահութահարկից, հաջորդ երեք տարիների ընթացքում այդ հարկը վճարում էին 50%-ի չափով: Երկրի հյուսիս-արևմտյան շրջաններում շահութահարկից ազատվում էին մինչև 8 տարի ժամկետով: Հատկանշական է, որ 100% օտարերկրյա մասնակցութուն ունեցող ընկերությունները կարող են գործել միայն արտադրության, վերամշակման և արտադրանքի հավաքման ոլորտներում:
Նպատակ ունենալով նպաստել բարձր տեխնոլոգիաների զարգացմանը՝ այդ ուղղվածությունն ունեցող ընկերություններն ընդհանրապես սկսեցին ազատվել շահութահարկից կամ էլ օգտվել այս հարկի վճարման արտոնություններից:
article_pic21Երկրի տնտեսության զարգացման նպատակով պետության կողմից ստեղծած վերոնշյալ նախադրյալները և երկրում առկա էժան աշխատուժը զարկ տվեցին Չինաստանի տնտեսության զարգացմանը: Ամբողջ աշխարհով հայտնի բրենդերը տեղափոխեցին իրենց արտադրությունը Չինաստան:
Այսօր Չինաստանն աչքի է ընկնում ուղղակի արտասահմանյան ներդրումների բարձր մակարդակով և, վիճակագրական տվյալների համաձայն, 2012-2013թթ.-ին ուղղակի օտարերկրյա ներդրումների ներհոսքով աշխարհում զբաղեցրել է 2-րդ տեղը:
2009թ.-ի տնտեսական ճգնաժամը, ինչ խոսք, հարվածեց նաև Չինաստանի տնտեսությանը, քանի որ այս երկրի տնտեսությունը սերտորեն կապված է արտահանման հետ:
Չինական ընկերությունները սկսեցին սննկանալ, քանզի նրանց արտադրանքն այլևս պահանջարկ չուներ արտասահմանում: Թվում էր, որ «չինական հրաշք»-ն ուր որ է կընկնի անդունդը: Սակայն չինացիներն այս անգամ էլ ելք գտան’ խթանելով սպառումը երկրի ներսում:
Ի տարբերություն շատերիս համար քաջ հայտնի քաղաքականության, այն է’ գների բարձրացում ճգնաժամի ժամանակ, Չինաստանն ընտրեց «Ճգնաժամն էժանություն» է նշանաբանը:
Չինական տարբեր քաղաքներում ընթացող շինարարությունը, որը կանգնեցվել էր ճգնաժամի պատճառով, նորից թափ առավ, քանզի կենտրոնական բանկը, իջեցնելով հիփոթեքային վարկերի տոկոսադրույքները, նույնը ստիպեց անել նաև առևտրային բանկերին: Արդյունքում’ տարվա ընթացքում տրամադրված հիփոթեքային վարկերի թիվը մոտ 10 անգամ գերազանցեց նախորդ տարվա ցուցանիշը:
Ծրագիրը, որն ուղղված էր ճգնաժամի դեմ պայքարին, ներառում էր գյուղական վայրերում երկաթգծերի, նոր գործարանների, կինոթատրոնների, սուպերմարկետների կառուցում, ինչի արդյունքում գյուղացիներն ապահովվեցին աշխատատեղերով:
Ներկայումս Չինաստանի տնտեսության «շարժիչ» է հանդիսանում ներքին սպառումը, ներքին պահանջարկը:
Անդամակցելով ԱՀԿ-ին’ 2008թ.-ի սկզբից Չինաստանը վերացրեց օտարերկրյա ներդրողներին տրվող հարկային արտոնությունները, ինչի արդյունքում տեղական և օտարերկրյա կապիտալով ձեռնարկությունները սկսեցին կրել նույն հարկային բեռը: Այս փոփոխությունը խթանեց տեղական ընկերությունների գործունեությունը, քանզի վերջիններս մինչ այդ ավելի բարձր հարկեր էին վճարում:
Չինաստանում կիրառվում են ավելացված արժեքի հարկի 3% և 17% դրույքաչափեր’ համապատասխանաբար մանր և սովորական հարկատուների նկատմամբ, ընդ որում, եթե սովորական հարկատուների պարագայում արտահանման ժամանակ նախատեսվում է վճարված ավելացված արժեքի հարկի վերադարձ, ապա մանր հարկատուների կողմից արտահանում իրականացնելու դեպքում ավելացված արժեքի հարկը չի վերադարձվում: Սա ապացույց է այն փաստի, որ կառավարությունը ձգտում է խթանել տեղական փոքր ձեռնարկությունների գործունեությունը:
«Չինական հրաշք»-ի մասին կարելի է երկար խոսել, փորձել դասեր քաղել այս երկրի անցած ուղուց, փորձել հասկանալ, թե որն է իրականում եղել այս երկրի հաջողության գրավականը:
Կարծում եմ, որ այս պետության զարգացման պատմությունը կարող է նաև լավ օրինակ ծառայել մեր երկրի համար’ իհարկե հաշվի առնելով մեր տնտեսության առանձնահատկությունները:
Ի վերջո, կգա՞ մի ժամանակ, որ Հայաստանի Հանրապետությունը թռիչքային զարգացում ապահովի և ունենա իր «հայկական հրաշք»-ի մոդելը: