14 Dec 2017

Հարգելի համաքաղաքացիներ

Խորհրդարանական ընտրությունները, որոնք կայացան մայիսի 6-ին, անցան պատմության գիրկը:
Առիթ ունեցել եմ ասելու, որ այդ ընտրություններում ես չեմ պարտվել, “հաղթել են” ընդամենը պետության վարչական, ուժային, դատախազական, ֆինանսական ռեսուրսները, կատարելության հասցված կեղծիքների եւ անվավերների մեխանիզմը:

Ես ընտրվել եմ, բայց ինձ չեն գրանցել:

Այնուամենայնիվ, ես հիասթափված չեմ: Ավելին, հետընտրական այս շրջանում բազմաթիվ հեռախոսազանգերն ու ինձ հասցեագրված նամակները վստահություն են ներշնչում, որ Հայաստանում արագ ձեվավորվող ազատ եւ արժանապատիվ քաղաքացիների բազմության շնորհիվ մենք ունենալու ենք մեր երազած անվտանգ եւ արդար երկիրը:

Կրկին խոստանում եմ. անկախ ընտրությունների արդյունքներից, հնարավորություններիս չափով, կիսելու եմ ընտրատարածքի բնակիչների հոգսերը եւ միշտ հասանելի եմ լինելու նրանց համար: Ձեզ հուզող հարցերով ինձ կարող եք դիմել saribek.sukiasyan@gmail.com էլեկտրոնային փոստի միջոցով, կամ այցելել մշտապես գործող Սուքիասյանների հանրության հետ կապերի գրասենյակ:

Անկեղծորեն
Սարիբեկ Սուքիասյան

09June
Comments Off

2016թ. նշանակալից տարի էր ՀԷԲ պատմության մեջ

19075020_878987878915491_919812874_n«Ժողովուրդ» օրաթերթը զրուցել է «Հայէկոնոմբանկ» ՓԲԸ խորհրդի նախագահ Սարիբեկ Սուքիասյանի հետ:

-Պարո՛ն Սուքիասյան, հունիսի 23-ին կայանալու է «Հայէկոնոմբանկի» (ՀԷԲ) տարեկան ժողովը, որտեղ կամփոփվի Բանկի 2016թ. գործունեությունը: Ինչպիսի՞ն է Ձեր գնահատականը նախորդ տարվա վերաբերյալ:

-2016թ. շատ ուժ եւ եռանդ պահանջեց մեզանից, եւ գործադրված ջանքերն ապարդյուն չանցան: Ավելին՝ նախորդ տարին, կարծում եմ, ամենանշանակալիցներից մեկն էր ՀԷԲ-ի պատմության մեջ: Դատեք ինքներդ. Բանկն իրեն միացրեց ԲՏԱ բանկը, ապահովեց ՀՀ կենտրոնական բանկի կողմից բանկերի նորմատիվային կապիտալի համար սահմանված եւ 2017թ.-ի հունվարի 1-ից ուժի մեջ մտած 30 մլրդ ՀՀ դրամի պահանջը: Բանկի ընդհանուր կապիտալն աճեց 6 անգամ` ի հաշիվ բաժնետոմսերի թողարկման եւ ԲՏԱ Բանկի միացման: Ինչպես տեսնում եք՝ «Հայէկոնոմբանկի» համար 2016թ.-ը վստահաբար կարելի է որակել որպես ձեռքբերումների եւ վերելքի տարի:

-Նորմատիվային կապիտալի կտրուկ համալրման անհրաժեշտությունը դժվարություններ չառաջացրե՞ց:

-Ո՛չ, քանի որ պատրաստ էինք այդ համալրմանը եւ անշեղորեն իրագործում էինք մեր կողմից մշակված ռազմավարական ծրագիրը: Ասեմ ավելին՝ նույնիսկ կապիտալը համալրելու եւ ԲՏԱ բանկը ՀԷԲ-ին միավորելու դժվարին եւ պատասխանատու գործընթացին զուգահեռ՝ Բանկը 2016-ին զգալի աճ է գրանցել հաճախորդներին տրված վարկերի, հաճախորդներից ներգրավված ավանդների գծով, ինչը խոսում է հաճախորդների կողմից Բանկի նկատմամբ շարունակաբար աճող վստահության մասին: Այս բոլոր նվաճումները ՀԷԲ-ի որդեգրած զարգացման ռազմավարության հետեւողական իրականացման արդյունք են, բաժնետերերի, խորհրդի, վարչության անդամների եւ Բանկի բոլոր աշխատակիցների արդյունավետ եւ ակտիվ գործունեության վկայությունը: -Իսկ ինչպիսի՞ն է շուկան այսօր, եւ որ՞ն է ՀԷԲ-ի մրցակցային առավելությունը:

-Գաղտնիք չէ, որ Հայաստանի առեւտրային բանկերը այս ժամանակահատվածում հիմնականում իրացվելիության խնդիր չունեն: Միաժամանակ, շուկայում մրցակցությունը շատ է սրվել: Պայքար է գնում յուրաքանչյուր հաճախորդի համար: Արդյունքում առավելություն են ձեռք բերում այն բանկերը, որոնք ավելի մատչելի ռեսուրսներ ունեն եւ ավելի ճկուն են ներկայիս մրցակցության պայմաններում: Իհարկե, հաջողությունն ուղեկցելու է նրանց, ովքեր արժեւորում են հաճախորդի դերը. լավ բանկին լավ հաճախորդ է անհրաժեշտ, իսկ լավ հաճախորդին` լավ բանկ: «Հայէկոնոմբանկի» հաջողությունները, կարծում եմ, պայմանավորված են մի շարք գործոններով: Մենք ավանդաբար առաջնորդվում ենք կորպորատիվ կառավարման հիմունքներով` խոշոր եւ փոքր բաժնետերերի իրավունքների հավասարությամբ եւ պաշտպանությամբ, գործունեության թափանցիկությամբ, շահագրգիռ անձանց մասնակցությամբ ընկերության կառավարմանը: Նման գործելաոճը մեծապես գրավում է օտարերկրյա ինստիտուցիոնալ ներդրողներին, որոնք ցանկանում են տեսնել, թե ինչպես են օգտագործվում իրենց ներդրումները: ՀԷԲ-ն իր հերթին միշտ ձգտում է համագործակցել օտարերկրյա ֆինանսական կառույցների հետ, քանզի նման համագործակցությունը թույլ է տալիս ժամանակին համընթաց շարժվել եւ աշխատանքում կիրառել նաեւ օտարերկրյա փորձն ու գիտելիքները:

-Կարողանալո՞ւ եք պահպանել Ձեր կողմից նշված շոշափելի աճի տեմպերը նաեւ այս տարի:

-Համոզված եմ, որ այո: Այսօր ՀԷԲ-ի նորմատիվային կապիտալն արդեն կազմում է մոտ 32 մլրդ ՀՀ դրամ: 2017թ. առաջին եռամսյակի շահույթը 154%-ով գերազանցում է նախորդ տարվա նույն ժամանակահատվածի շահույթի ցուցանիշը: Գործող 48 մասնաճյուղերին առաջիկայում կավելանան եւս երկուսը: Եվ, ըստ իս, ամենակարեւորը. ուրախությամբ պետք է նշեմ, որ 2016թ. արդյունքներով եւս պիտի շահաբաժին վճարենք: Ի վերջո, բանկային բիզնեսի կարեւորագույն նպատակներից է շահաբաժիններ վճարելը: Բաժնետերերն արժանի են, որ իրենց սպասելիքներն արդարացվեն: Արդեն 15 տարի է, ինչ շահաբաժինների վճարման հարցում ՀԷԲ-ի որդեգրած քաղաքականությունը բաժնետերերի համար կայուն եկամտի աղբյուր է հանդիսանում: Եվ, իհարկե, այս քաղաքականությունը մեծապես նպաստել է նրան, որ ներկայումս Բանկն ունի 3500 բաժնետեր:

-Բացի Սուքիասյանների ընտանիքից՝ ովքե՞ր են ներկայումս ՀԷԲ-ի բաժնետերերը:

-Այսօր Բանկն ունի փոքր մասնակցություն ունեցող բազմաթիվ բաժնետերեր: Վերջին երկու տարիների ընթացքում տեղի ունեցած բաժնետոմսերի երկու տեղաբաշխումների արդյունքում այդ բաժնետերերի թիվն աճեց մոտ 2000-ով: Ինչպես եւ նախկինում մենք` Սուքիասյան եղբայրներս, տնօրինում ենք Բանկի բաժնետոմսերի հսկիչ փաթեթը: Շարունակում է պահպանել իր մասնակցությունը Բանկի կապիտալում «Վերակառուցման եւ զարգացման Եվրոպական բանկը» (ՎԶԵԲ): Ներկայումս բանակցություններ են ընթանում մի քանի օտարերկրյա ինստիտուցիոնալ ներդրողների հետ` ՀԷԲ-ում կապիտալում նշանակալից մասնակցություն ձեռք բերելու նպատակով:

-Պարո՛ն Սուքիասյան, ըստ Ձեզ՝ ինչպե՞ս է անդրադառնում մոտիվացիան աշխատանքի որակի վրա, եւ ինչպիսի՞ մոտիվացիոն մեխանիզմներ են կիրառվում ՀԷԲ-ում:

-Աշխատողների մոտիվացիան մշտապես եղել է աշխատանքի շարժիչ ուժը, նպաստել աշխատանքի արդյունավետության բարձրացմանը, բիզնեսի զարգացմանը: Ընդհանրապես, աշխատողների մոտիվացիան պետք է հանդիսանա ցանկացած կազմակերպության կադրային քաղաքականության հիմնարար տարրերից մեկը: Ղեկավարը պարտավոր է արդար վերաբերմունք ցուցաբերել իր աշխատակիցների նկատմամբ, մոտիվացնել եւ դրանով իսկ ոգեշնչել նրանց: Ըմբռնելով մոտիվացիայի դերը որպես հաջողակ բիզնեսի կայացման եւ պահպանման կարեւոր գործոն` ՀԷԲ-ը մշտապես կիրառում է աշխատակիցների եւ ղեկավարների տարբեր մոտիվացիոն մեխանիզմներ՝ ինչպես աշխատավարձերի վերանայման եւ պարգեւատրման, այնպես էլ կադրային առաջընթացի, գործուղումների, ուսման ֆինանսավորման եւ անգամ հանգստի կազմակերպմանն աջակցության տեսքով:

-Պարո՛ն Սուքիասյան, բանկիրները սնահավատ մարդկանց համբավ ունեն, քանի որ նրանք առնչվում են ֆինանսների հետ, իսկ փողը հատուկ ուշադրություն եւ զգուշավոր վերաբերմունք է պահանջում: Արդյո՞ք Դուք Ձեզ սնահավատ մարդ եք համարում:

– Ասել, թե ես սնահավատ եմ, թերեւս սխալ կլինի: Ինձ համար չկան հատուկ իմաստ պարունակող նշաններ, բայց չեմ էլ կարող հերքել, որ զգուշավոր եմ, ինչն էլ երեւի պայմանավորված է երկարամյա փորձով: Աշխատանքում առաջնորդվում եմ ունեցածս գիտելիքներով, փորձով, երբեմն էլ ինտուիցիայով:

Զրույցեց Անի Ստեփանյանը

08March
Comments Off

Սիրելի մեր մայրեր, քույրեր, կանայք եվ աղջիկներ

2Սիրելի մեր մայրեր, քույրեր, կանայք եվ աղջիկներ

Եղեք միշտ առողջ, երջանիկ և գեղեցիկ

Ընդունեք իմ անկեղծ շնորհավորանքները տոնի կապակցությամբ:

Հարգանքներով` Սարիբեկ Սուքիասյան

27December
Comments Off

բացիկ

Հարգելի ընկերներ

Շնորհավորում եմ Ձեր Ամանորն ու Սուրբ ծնունդը

Համոզված եմ, որ Նոր տարում հաղթանակներն ավելի շատ են լինելու, արևը` ավելի վառ, երջանկությունը` լիարժեք, տրամադրությունը` բարձր, իսկ եկամուտները` կայուն:

Հարգանքներով Սարիբեկ Սուքիասյան

29October
Comments Off

Բոլոր այն բանկերը, որոնք կմնան շուկայում, ազատ ռեսուրսների ավելցուկ են ունենալու.

11582b5e3ff02901c5f4d9389a6865f6-Պարո՛ն Սուքիասյան, 2017թ.-ի հունվարի 1-ից ուժի մեջ է մտնում ՀՀ կենտրոնական բանկի որոշումը, որի համաձայն՝ ՀՀ բանկերի նորմատիվային կապիտալի նվազագույն չափը պետք է կազմի 30 մլրդ ՀՀ դրամ: Կբավարարի՞ այդ պահանջը ՀԱՅԷԿՈՆՈՄԲԱՆԿԸ:

-Անշուշտ կբավարարի: Հոկտեմբերի 25-ին ավարտվեց ՀԱՅԷԿՈՆՈՄԲԱՆԿԻ բաժնետոմսերի հերթական տեղաբաշխումը, որի արդյունքները մոտ մեկ ամսից կներկայացվեն Բանկի բաժնետերերի ընդհանուր ժողովի հաստատմանը, ապա՝ ՀՀ կենտրոնական բանկի գրանցմանը: Այս տեղաբաշխման արդյունքում ՀԱՅԷԿՈՆՈՄԲԱՆԿԻ 145 հազար հատ բաժնետոմս է տեղաբաշխվել` յուրաքանյուրը 14.600 ՀՀ դրամ արժեքով։ ՀՀ կենտրոնական բանկի կողմից տեղաբաշխման արդյունքները գրանցելուց հետո ՀԱՅԷԿՈՆՈՄԲԱՆԿԻ նորմատիվային կապիտալը կկազմի մոտ 31 մլրդ ՀՀ դրամ, այսինքն՝ այսօր արդեն կարող ենք ասել, որ ՀԱՅԷԿՈՆՈՄԲԱՆԿԸ համապատասխանեցրել է իր նորմատիվային կապիտալը վերը նշված պահանջին:

-Վերջերս հաճախ դժգոհություններ ենք լսում՝ կապված տրամադրվող վարկերի բարձր տոկոսադրույքների հետ: Հնարավո՞ր եք համարում այդ տոկոսադրույքների իջեցումը:

-Այդպիսի դժգոհություններ նախկինում եւս հնչել են: Մարդիկ սովորություն ունեն համեմատելու ՀՀ-ում եւ, օրինակ, արեւմտյան երկրներում գործող տոկոսադրույքների միջին չափը, իսկ այնտեղ տոկոսադրույքներն ավելի ցածր են: Սա հասկանալի դժգոհություն է, քանի որ հաճախորդների համար ամենագրավիչ պայմանները վարկերի համար կիրառվող ցածր եւ ավանդների համար կիրառվող բարձր տոկոսադրույքներն են: Սակայն ավանդների եւ վարկերի տոկոսադրույքներն ուղիղ համեմատական են միմյանց. եթե բանկերն իջեցնեն վարկերի տոկոսադրույքները, ապա կիջնեն նաեւ ավանդների տոկոսադրույքները:

Կարծում եմ, որ 2017 թ. նոր էջ է բացում ՀՀ բանկային համակարգի պատմության մեջ. հենց առաջիկա տարում է սկսվելու բանկերի միջեւ իրական մրցակցությունը: Բոլոր այն բանկերը, որոնք կմնան շուկայում, ազատ ռեսուրսների ավելցուկ են ունենալու եւ փորձելու են հնարավորինս շատ հաճախորդներ ներգրավել:

Ազատ ռեսուրսների ավելցուկի պայմաններում բնական է, որ կարող են իջնել ավանդների տոկոսադրույքները: Բայց այստեղ պետք է նաեւ հաշվի առնել, որ ՀՀ բանկային համակարգը տարեկան մոտ 150 մլրդ ՀՀ դրամ ավանդի տոկոս է վճարում ավադատուներին: Դա բավականին մեծ գումար է, եւ, ուրեմն, հազարավոր մարդիկ անուղղակիորեն ներգրավված են բիզնեսում, այսինքն` մասնակցում են բիզնեսին, ստանում եկամուտ ներդրված ավանդներից եւ վճարում եկամտահարկ:

 -Պարո՛ն Սուքիասյան, վերջերս մամուլում հրապարակումներ եղան այն մասին, որ ՀՀ կենտրոնական բանկն առեւտրային բանկերին ստիպում է աշխատակիցների կուտակային գումարները վճարել կենսաթոշակային ֆոնդերին: Ճի՞շտ են այդ լուրերը, արդյո՞ք նման խնդրի հետ առնչվել է նաեւ ՀԱՅԷԿՈՆՈՄԲԱՆԿԸ:

-Անհիմն եմ համարում նման հրապարակումները: ՀՀ կենտրոնական բանկը վերահսկողական գործառույթ իրականացնող մարմին է, եւ վստահաբար կարող եմ ասել, որ ՀԱՅԷԿՈՆՈՄԲԱՆԿԻ նկատմամբ երբեւէ հարկադրանք չի եղել այս եւ որեւէ այլ հարցում: Ճիշտ է՝ Բանկն է աշխատավարձ վճարում աշխատակիցներին, սակայն աշխատակիցներն ազատ են իրենց ընտրության մեջ, իրենք են տնօրինում իրենց կուտակումները, իսկ Բանկը պարզապես հանդես է գալիս որպես նրանց գործակալ հարկերի գծով:

 -Թեպետ 2016թ. դեռ չի ավարտվել, սակայն շատերը նշում են, որ 2016թ. բավականին դժվար տարի էր ՀՀ բանկային համակարգի համար: Ինչպիսի՞ն էր ՀԱՅԷԿՈՆՈՄԲԱՆԿԻ համար այս տարին:

-Փորձելով ամփոփել տարին` կարող եմ ասել, որ մենք բավականին ուժ եւ եռանդ ներդրեցինք այս տարվա ընթացքում: ՀԱՅԷԿՈՆՈՄԲԱՆԿՆ այսօր շատ է խոշորացել, ներկայումս ունենք 47 մասնաճյուղ, մինչդեռ տարվա սկզբին մասնաճյուղերի թիվը 40 էր: Աճ ենք արձանագրել բոլոր ցուցանիշներով, գործընկերական շրջանակը զգալիորեն մեծացել է:

2016թ.-ին բանկի կապիտալն աճեց բաժնետոմսերի տեղաբաշխումների, միացման եւ մեր ընտանիքի կողմից կատարված ներդրումների հաշվին, ինչի շնորհիվ կարողացանք ապահովել ՀՀ կենտրոնական բանկի 30 մլրդ ՀՀ դրամ նորմատիվային կապիտալի պահանջը:

-Եվ վերջին հարցը. ինչպե՞ս է ընթանում ՀԱՅԷԿՈՆՈՄԲԱՆԿԻ եւ միջազգային կառույցների համագործակցությունը:

-Բանկն, ինչպես միշտ, շարունակում է սերտորեն համագործակցել իր վաղեմի գործընկեր եւ բաժնետեր Վերակառուցման եւ Զարգացման Եվրոպական Բանկի հետ: 2016թ.-ի ընթացքում Բանկը 34 մլն ԱՄՆ դոլար է ներգրավել արտասահմանյան ֆոնդերից` Symbiotics S.A., BlueOrchard Finance S.A, Incofin Investment Management, որից 24 մլն. ԱՄՆ դոլարն ուղղվել է փոքր եւ միջին ձեռնարկությունների զարգացմանը: Նաեւ ավելի քան 1,7 մլրդ ՀՀ դրամի ներգրավումներ են կատարվել ՀՀ կենտրոնական բանկի ծրագրով` KfW բանկի՝ Գերմանա-հայկական հիմնադրամի կողմից կառավարվող միջոցներից եւ այլ աղբյուրներից, որի հիմնական մասն ուղղվել է միկրո, փոքր ու միջին ձեռնարկությունների զարգացմանը:

Ներկայումս շարունակվում են բանակցությունները նաեւ նոր ներգրավումների ուղղությամբ, ուստի հուսով եմ, որ մինչեւ տարվա վերջ ներգրավված միջոցների ծավալը եւս կաճի:

ՀԱՅԷԿՈՆՈՄԲԱՆԿԸ միշտ մնում է կայուն զարգացող բանկ, միշտ նոր գրավիչ առաջարկներով է հանդես գալիս իր հաճախորդների համար, եւ մեր շահերը միշտ համընկնում են:

07March
Comments Off

buket-lepestki-listya-2754Սիրելի կանայք

Ընդունեք իմ ջերմ շնորհավորանքները կանանց Միջազգային օրվա կապակցությամբ:

Այսօր բարձրաձայնած բարեմախթանքները  գեղեցկության, երջանկության և առողջության վերաբերյալ թող միշտ լինեն Ձեր կյանքի անբաժանելի մասը:

 

Հարգանքներով Սարիբեկ Սուքիասյան